المويـــــــــمة....... للراحل كمال مسعودي°°

المويـــــمة

بسمك نبدا يا الله هاذ الأسطار ..... نذكر إسمك بخشوع توب عليا

يا محمد يا رسول ليك الفرار ..... من بعد اللي مشات العزيزة عليا

لحقها الأجل و طفى شمعة الدار .... بقيت وحدي وحيد ماكان اللي بيا

جات الموت اداتلي مومو الأبصار ..... الحنينة مويمتي مشات علي

تبعت الغربة و قطعت المزار ..... دارو علي أعوام و نسيت الولية

غرتني الغربة ما فرحتها بأخبار ..... ما عرفت حتى وين تلحق بيا

نهار تكاكيت و راييت براي كبار ..... وجه مويمتي جا ما بين عينيا

من عينيا سالو دمعات غزار ..... وحش مويمتي ياو خيي هاج علي

زعزعني بأخبار ذاك البشار ..... ظلام نهاري و تحطم منايا

عدات صغرها صابرة على المرار.... غير باش تهديلي عيش يليق بيا
.
الصبح نصبح على وجه النوار ..... السيسان و الياسمين دايرين بيا

ترفد يديها كل ما يطلع النهار ..... من دعوات الخير ندي بالمية

عند غروب الشمس نصيبها عند باب الدار .... شطنها غيابي تبكي بشوية

اليوم بلا باب بقيت يستر الدار .... طفات الشمعة ذابت على طرية
.
تمنات تشوفني قبل ما تروح الأعمار .... هذا ما تمنات و توادع الدنيا

و أنا عليها بعيد زاهي مع الصغار.... ما خممت نهار اللي تركتو ورايا

ماتت مويمتي و على قلبها نار ... دخلت في قبرها محروقة علي

لعب بيا الزمان و رجعني غدار .... خرجت خرجة في الحياة خرجت فيا

نفديك بأموال ما في الأرض و البحار .... أش ندير لمويمتي تسمح ليا

صابت اللي وقفو عليها قربان وجار .... قامو بالجنازة دفنوها بلا بيا

حوسو عباد الله ليمن يعظمو الأجر .... و وليدها عايب من ذي الجمعية

دخلت للدار طاح عليا ريح الصرصار .... فشلي قوايمي و بردلي حشايا

بقيت في شوكة نخمم في اللي صار.... نبكي و بكايا ما ينفع فيا

مويمتي أنا في خيرك ماني نكار .... الوقت ما كفاني ندير اللي عليا
.
مويمتي وين هي اللي نوات تديرلي الدار.... و تزينلي فرحتي تفرح بيا

مويمتي وين هي اللي تحمل الأزهار..... و تشوف اللي تولي عروستها حلالية

مويمتي وين هي تعمر الطبق تعمار .... بشموعو و حنانيه و كل حلية

مويمتي وين هي اللي تقدم على المختار .... فال على فالو في قولها نية

بالتزغريدات مويمتي تسكت الأطيار .... مضارية في القعدات بالفنطازية

من فرقة المويمة يبكي المشرار .... واش يقول مسكين مول الصفى و النية

حب المويمة يا خيي راه حب مطيار ... فراغها ما يتعمر بكنوز الدنيا

كلشي يتخلف ما دامت الأعمار .... غير فراق المويمة يا سامع ليا

بالله يا اللايم من يبكي بجهار .... لا تلومو دمعات الفراق قوية

من بكى على مويمتو راه داير عار .... خلوه براسو دمعتو مجرية

خلوني نجرع الكاتبة من الستار.... سبحانو العالم بكل خفية

ما أصعب فرقتها خلاتني زهار .... ما عرفت نتصرف في أي قضية

خير و جميل المويمة مالو تعبار.... منك الطاعة ليها خير هدية
.
عامل و أخدم مويمتك الحياة مرار.... ما يفيدك عصيان ولا أعمال السية

الطاعة و الصلاة على تاج الأبرار .... تلقاه في كتابك ما فيه خطية

أسمحيلي يا مويمتي قبل المشوار.... أسمحي لقبايحي و مافت علي

أسمحي يا مويمتي في هاذ الدار.... بعد الرحول سماحك ما يفيد فيا

أسمحيلي يا مويمت إذ كنت مغيار ... دار الدنيا غرتني و لعبت بيا

أسمحيلي يا مويمتي راني في قفار قولي شكون غيرك اللي يروف عليا

أسمحيلي يا مويمتي بجاه المختار بشرنا بالخير و فضيلة الولية

أبكي و أدعي يا اليتيم حالك معذار ... اللي حرق حشاك حرق حشايا

أتيقن طيع و صون كل ليلة ونهار .... الصبر هذا صارم لهموم الدنيا

هذا القول فصيح لسهول التهزار.... و اللي قلبو حنين يفهم القصية

و اللي داير أقوال كلامي للتقصار .... هذاك جبحو فارغ و أعضاه مجفية

و إذا سألت على ناظم الأشعار .... قول مسعودي غلام رب الكلية

يطلب الرحمة مادامنا زيار .... ندخلو قبورنا ياسعدنا هنية

أنا و المومنين بالله كبار و صغار .... بشفاعة سيدنا الهادي خير منية

جات الموت اداتلي مومو الأبصار ... الحنينة مويمتي مشات عليا

بقلم المرحوم كمال مسعودي

الله يرحمه ولبا امهات المسلمين وبارك الله فيك وفي اختيارك الرئع ننتظر مثل هالقصائد لاتحرمنا منها

سكوتي الم كتب:: الله يرحمه ولبا امهات المسلمين وبارك الله فيك وفي اختيارك الرئع ننتظر مثل هالقصائد لاتحرمنا منها

تحية وشكر جزيل يليق بك اختي الكريمة

وطلبك على العين والراس

شكرا مجددا

» الحجاب ............ اغنية كمال مسعودي